"මැතිවරණ අපේක්ෂකත්වය" වෙනුවෙන් රාජ්‍ය දේපළ පාවිච්චි කරනවානම් ඒකට අපි විරුද්ධයි ! | Colombocall "මැතිවරණ අපේක්ෂකත්වය" වෙනුවෙන් රාජ්‍ය දේපළ පාවිච්චි කරනවානම් ඒකට අපි විරුද්ධයි ! - Colombocall

Hot News

"මැතිවරණ අපේක්ෂකත්වය" වෙනුවෙන් රාජ්‍ය දේපළ පාවිච්චි කරනවානම් ඒකට අපි විරුද්ධයි !



රාජ්‍ය ඇමතිවරුන් ලෙස කටයුතු කොට, පාර්ලිමේන්තුව විසුරුවාහැරීමෙන් තනතුරු අහිමි වූ පුද්ගලයන්ට මැතිවරණ ප‍්‍රචාරක කටයුතු සඳහා රජයේ නිල වාහන හා නිල නිවාස පාවිච්චියට ලබාදීම සඳහා කැබිනට් මණ්ඩල අනුමැතිය ලබාදී ඇති බවත්, එය මැතිවරණ නීති උල්ලංඝනය කිරීමක් බවත් සඳහන් කරමින් ජනතා විමුක්ති පෙරමුණේ හිටපු පාර්ලිමේන්තු මන්ත‍්‍රී සුනිල් හඳුන්නෙත්ති මැතිවරණ කොමිෂන් සභාව වෙත පැමිණිල්ලක් සිදුකර ඇත.
මැයි 10 වැනිදා එම පැමිණිල්ල සිදුකර තිබේ. පැමිණිලි කිරීමෙන් පසුව මාධ්‍ය වෙත අදහස් දක්වමින් ඔහු මෙසේ පැවසීය.
‘මැතිවරණ කොමිසමේ නිර්දේශයන්ට පටහැණිව ආණ්ඩුව කැබිනට් තීරණයක් අරගෙන තියෙනවා පහුගියදා, ආණ්ඩුවේ රාජ්‍ය ඇමතිවරුන්ටත් මැතිවරණයේ තමන්ගේ අපේක්ෂකත්වය ප‍්‍රවර්ධනය කිරීම සඳහා නිල වාහන පාවිච්ච කරන්න අවසර ලැබෙන විදියට. ඒ ගාස්තුවක් ගෙවලා, ගාස්තුවකට යටත් කරලා. මේක කැබිනට් මණ්ඩලය රෙන්ට් අ කාර්, කාර් සේල් එකක් බවට පත්කිරීමක්. කැබිනට් මණ්ඩලය කාර් සේල් එකක්ද කියලා අහන්න වෙනවා.
එහෙම කරනවා නම්, ඒකත් කරන්න ඕනෑ හැම පක්ෂයේම හැම අපේක්ෂකයාටම වාහන කුලියට දෙන ආයතනයක් කියලා කරන්න වෙනවා. එහෙනම් ඒක සාධාරණයි. මෙතැන පොහොට්ටුවේ ඇමතිවරු තමයි රාජ්‍ය ඇමතිවරු විදියට හිටියේ.
රාජ්‍ය ඇමති කියන එක අවලංගුයි. මැතිවරණ නීතිය අනුව දැනට රටේ වලංගුතාවය තියෙන්නේ කැබිනට් මණ්ඩලයට පමණයි. කැබිනට් මණ්ඩලය වුණත් මැතිවරණ අපේක්ෂකත්වය වෙනුවෙන් රාජ්‍ය දේපළ පාවිච්චි කරනවානම් ඒකටත් අපි විරුද්ධයි. ඒත් ඔවුන් ඇමතිවරුන් නිසා යම් හෝ සාධාරණීකරණයක් කරන්න පුළුවන්. නමුත් රාජ්‍ය ඇමතිවරුන් රොත්තකට රටේ සල්ලි, මහජනතාවගේ සල්ලි වාහනේට විතරක් නෙවෙයි, ඉන්ධන පහසුකම් සහිතව, රියැදුරෙකුත් එක්ක දෙන්නෙ කොහොමද.
ආණ්ඩුව එක පැත්තකින් සල්ලි නෑ, මැයි මාසෙ පඩිය ගෙවාගගන්න විදියක් නෑ කියලා ජනතාවගේ පඩියෙන් කොටසක් හිඟා කනවා. අනෙක් පැත්තෙන් රාජ්‍ය ඇමතිවරුන්ට දෙනවා තමන්ගේ නිල නිවාස හා වාහන පාවිච්චි කරන්න.
මේ අපි සාමාන්‍යයෙන් පාවිච්චි කරන වාහන නෙවෙයි. බී.එම්.ඩබ්ලිව්., හා වී8 වගේ වාහන. මේවා සාමාන්‍යයෙන් ලක්ෂ තුනක් පමණ වෙනවා කුලියට ගන්නකොට. ආණ්ඩුව අය කරගන්නේ ලක්ෂයක්. ඔවුන් ඒකෙන් වාහනය දීම සාධාරණීකරණය කරනවා. මේක මැතිවරණ නීතිය උල්ලංඝනය කිරීමක්. එමෙන්ම මේ මොහොතේ රටේ ජනතාව සහ රාජ්‍ය සේවකයන් කරන කැපකිරීම අමු අමුවේ හෑල්ලූවට ලක් කිරිමක්. ආණ්ඩුව කිසිදු හිරිකිතයක් නැතිව තමන්ගේ මැතිවරණ ප‍්‍රචාරණයට ඇමතිවරුන්ට දීලා තියෙන වරප‍්‍රසාද ඉවත් කරන්න කියලා අපි ඉල්ලූවා.’