"මං තරම් කවුරුත් උතුරට ගිහින් නෑ" මෛත්‍රී ම කියයි | Colombocall "මං තරම් කවුරුත් උතුරට ගිහින් නෑ" මෛත්‍රී ම කියයි - Colombocall

Hot News

"මං තරම් කවුරුත් උතුරට ගිහින් නෑ" මෛත්‍රී ම කියයි





තමන් තරම් කිසිදු ජනාධිපතිවරයෙක් උතුරේ සංචාරය කර නොමැති බවත් තමන් ඒ සඳහා එක්වන්නේ එම ජනතාවගේ ගැටලු හඳුනාගනිමින් අදාළ සේවාවන් කඩිනම් කිරීමේ වගකීම නිසි ලෙස ඉටු කිරීමට බවත් ජනපති මෛත්‍රීපාල සිරිසේන මහතා පවසයි.

එසේම ආරක්ෂක අංශ භාරයේ පැවති උතුරේ ඉඩම්වලින් සියයට 88 ක් පමණ මේ වන විට මුල් පදිංචිකරුවන් වෙත නිදහස් කර අවසන් බවත් ඉතිරි සියයට 12 ක ප්‍රමාණය ද කඩිනමින් එම ජනතාව වෙත ලබාදිය යුතුය යන පැහැදිලි ප්‍රතිපත්තිය තුළ රජය කටයුතු කරන බවත් ඔහු පවසයි.

මයිලිඩ්ඩි ධීවර වරාය ප්‍රතිසංස්කරණය හා නැවත ක්‍රියාත්මක කිරීමේ සමාරම්භක අවස්ථාවට ඊයේ (22දා) පෙරවරුවේ එක්වෙමින් ජනපතිවරයා මෙම අදහස් දැක්වීය.

නැවත රට තුළ යුද්ධයක් ඇති නොවන අයුරින් කටයුතු කිරීම සියලුදෙනාගේ අරමුණ සහ අධිෂ්ඨානය විය යුතු බවත් ජීවිත දහස් ගණනක් අහිමි කරමින් හා ජාතික සම්පත්  විනාශ කර දමමින් රට ආපස්සට ඇද දැමු ම්ලේච්ඡ ත්‍රස්තවාදයට කිසිසේත් යළි රට තුළ ඉඩක් තැබිය නොහැකි බවද පැවැසීය.

මත්ද්‍රව්‍ය ගැටලුව පිළිබඳව අදහස් දැක්වූ ජනාධිපතිවරයා ප්‍රකාශ කළේ බන්ධනාගාරගතව සිටියදී ද මත්ද්‍රව්‍ය ජාවාරම්වලට සම්බන්ධව සිටින පුද්ගලයින්ට මරණීය දණ්ඩය ක්‍රියාත්මක කිරීම ඇතුළු නීති රීති කිසිදු පැකිලීමකින් තොරව ඉදිරියට ක්‍රියාත්මක කිරීමට කටයුතු කරන බවයි.